kamikāgama pūrvabhāga

Internal catalogue id	ochs_000_000_192_kamikagama_purvabhaga
Name (transliteration)	kamikagama purvabhaga
Provenance category	Muktabodha Digital Library
Provenance note	Acquired with permission from the Muktabodha Digital Library, https://muktabodha.org/digital-library/ Name of original Muktabodha source file: kamikAgama pUrvabhAga-M00124-IAST.txt. The copyright of the original manuscript is with the National Archives, Kathmandu (NAK)
External catalogue ids	Muktabodha information: Catalog number: M00124
External meta data	Additional Muktabodha meta data: Description: Transcribed from an edition in Grantha script published in Madras in 1909 Notes: Transcribed by the staff of Muktabodha under the supervision of Mark S. G. Dyczkowski. Revision 0: Sept. 17, 2008
Dating of original text	1909
Publisher	Publisher: 1909, Madras India
License	Use of this material (e-texts) is covered by Creative Commons license BY-NC 4.0. For the full text of the license see https://creativecommons.org/licenses/by-nc/4.0/. The work may be shared and adapted. The work may not be used for commercial purposes and you may not apply legal terms or technical measures that legally prevent others from doing anything this licence permits. You must give appropriate credit to Muktabodha Indological Research Institute in any reasonable manner, but not in any way that suggests the licensor endorses you or your use. Any use of the material not covered by this Creative Commons license must be authorized by Muktabodha Indological Research Institute in writing.

Table view

Source text

Source text 2

Show entries

Transliteration	Ordering

	1
\|\| śrīḥ \|\| śrī umāmaheśvarābhyāṃ namaḥ \|\|	2
vande mahāgaṇapatiṃ madanārisūnuṃ vāmorususthavanitābhujaveṣṭitāṅgam \| vallīśapūrvajamabhīṣṭadamāśritānāṃ vāṇīpatipramukhadevagaṇārcitāṅghrim \|\|	3
\|\| kāmikāgama - pūrvabhāgānukramaṇikā \|\|	4
tantrāvatāro mantrāṇāmuddhāraḥ snānamarcanam \| arcanāṅgaṃ ca naivedyavidhiḥ kuṇḍasya lakṣaṇam \|\| 1/1 \|\| agnikāryaṃ kālavidhirnimittasya parīkṣaṇam \| bhūparīkṣā praveśārthabalirgrāmādilakṣaṇam \|\| 1/2 \|\| śaṅkostu sthāpanaṃ caiva mānopakaraṇakramam \| padavinyāsabhedaśca sūtramarmādilakṣaṇam \|\| 1/3 \|\| vāstudevabaliḥ paścād grāmādīnāṃ ca lakṣaṇam \| vistārāyāma āyādilakṣyaṃ nakṣatracakrakam \|\| 1/4 \|\| daṇḍakādividhirvīthidvārādīnāṃ pramāṇakam \| grāmādidevatāsthānaṃ dvijasaṃkhyāvidhānakam \|\| 1/5 \|\| vinyāsasya viśeṣaśca brahmadevapadādi ca \| aṅgopajīvināṃ sthānaṃ garbhanyāsasya lakṣaṇam \|\| 1/6 \|\| bālasthānavidhānaṃ ca grāmādinyāsabhedataḥ \| vāstuśāntiśca śālāyā vidhānaṃ ca tataḥ param \|\| 1/7 \|\| nandyāvartaṃ dviśālā ca sarvatobhadrasaṃjñakam \| vardhamānaṃ khastikaṃ ca rūcakāravyamataḥ param \|\| 1/8 \|\| catuḥ śālā pañcaśālā hastiśālā ca mālikā \| lāṅgalākhyaṃ maulikaṃ ca mālikāpadmakaṃ param \|\| 1/9 \|\| nāgarādivibhedaṃ ca bhūmilambavidhistathā \| ādyeṣṭakopapīṭhaṃ ca pādānāṃ mānalakṣaṇam \|\| 1/10 \|\| prastarasya vidhiścaiva prāsādānāṃ ca bhūṣaṇam \| kaṇṭhasya śikharasyāpi sthūpikāyāśca lakṣaṇam \|\| 1/11 \|\| nālādisthāpanaṃ paścādekabhūmyādilakṣaṇam \| mūrdheṣṭakāvidhānaṃ ca liṅgalakṣmāṅkurārpaṇam \|\| 1/12 \|\| śivaliṅgapratiṣṭhā ca pratimānāṃ ca lakṣaṇam \| śūlasaṃsthāpanaṃ paścād devasthāpanasaṃjñakam \|\| 1/13 \|\| pratimānāṃ pratiṣṭhā ca vimānasthāpanaṃ param \| lakṣaṇaṃ maṇṭapānāṃ ca prākārāṇāṃ ca lakṣaṇam \|\| 1/14 \|\| sthāpanaṃ parivārāṇāṃ parivārārcanaṃ tathā \| vṛṣabhasthāpanaṃ cānte gopurasthāpanaṃ param \|\| 1/15 \|\|	5
catuḥsaptati saṃkhyātāḥ paṭalāḥ pūrvakāmike \|\|	6
	7
\|\| kāmikāgamottarabhāgānukramaṇikā \|\|	8
(pṛ0 2)	9
paścimadvārapūjā ca dakṣiṇadvārapūjanam \| arcanaṃ sakalānāṃ ca mahāsnapanalakṣaṇam \|\| 2/1 \|\| nityotsavavidhiḥ paścānmahotsavavidhiḥ param \| nīrājanakriyā pūrvā phalgunīpūjanaṃ param \|\| 2/2 \|\| ghṛtābhiṣekaṃ ḍolāyā rohaṇaṃ kṣaudrapūjanam \| dīpāvalividhānaṃ ca ghṛtakambalapūjanam \|\| 2/3 \|\| śivarātriratho gandhapūjā damanakārcanam \| vasantejyā śītakumbhaṃ phalapūjā pavitrakam \|\| 2/4 \|\| navanaivedyapūjā ca dīkṣā samayasaṃjñitā \| sthālīpākavidhiḥsvapnādhyāyo nirvāṇasaṃskṛtiḥ \|\| 2/5 \|\| ācāryasyābhiṣekaśca gotrapravaranirṇayaḥ \| śatābhiṣekaścāntyeṣṭiḥ pitṛyajñavidhistataḥ \|\| 2/6 \|\| śaivaśrāddhaṃ tataḥsarvaprāyaścittaṃ tataḥ param \| nityanaimittikaprāyaścittamutsavaniṣkṛtiḥ \|\| 2/7 \|\| adbhutānāṃ ca śāntiḥ syādanukarmavidhānakam \| saṃprokṣaṇaṃ ca pīṭhasya sthāpanaṃ ca tataḥ param \|\| 2/8 \|\| bāṇasya kāmyaliṅgasya pratiṣṭhā cārṣapauruṣayoḥ \| prāsādalakṣaṇaṃ liṅgavaśātprāsādalakṣaṇam \|\| 2/9 \|\| vyaktaliṅgapratiṣṭhā ca sārvadeśikaliṅginaḥ \| aṅgaliṅgapratiṣṭhā ca sadeśasthāpanaṃ tataḥ \|\| 2/10 \|\| devyā vighneśvarasyāpi sthāpanaṃ nṛttamūrtinaḥ \| somāskandasya candrārdhamaulestripuravairiṇaḥ \|\| 2/11 \|\| liṅgodbhavapratiṣṭhā ca dakṣiṇāmūrtinastathā \| bhikṣāṭanasya kaṅkālamūrteḥ pāśupatasya ca \|\| 2/12 \|\| triśūlaśarabheśānacaṇḍeśasthāpanādi ca \| śivabhaktāyudhānāṃ ca siṃhāsanavidhistathā \|\| 2/13 \|\| rathasya karaṇānāṃ ca lakṣaṇaṃ saukhyakarma ca \| vyādhināśo rājarakṣā durgāpūjāvidhistathā \|\| 2/14 \|\| śāntinīrājanaṃ puṣyābhiṣekagrahayajñakam \| bandhaḥ pratisarasyāpi tulābhāravidhānakam \|\| 2/15 \|\| hiraṇyagarbhadānaṃ ca tilaparvatadānakam \| suvarṇabhūmidānaṃ ca kalpavṛkṣapradānakam \|\| 2/16 \|\| gaṇeśadānaṃ sauvarṇadhenulakṣmīpradānakam \| tiladhenusahasraṃ ca gavāṃ dānasahasrakam (hemāśvadānakam?) \|\| 2/17 \|\| kanyādānaṃ hiraṇyokṣadānaṃ ca gajadānakam \| lokapālāṣṭakaṃ caiva sarvadānottamaṃ tathā \|\| 2/18 \|\|	10
ityuktāḥ ṣaṇṇavatyaśca paṭalāḥ kāmikottare \|	11
	12
\|\| śrīḥ \|\|	13
\|\| kāmikāgamaḥ \|\|	14
pūrvabhāgaḥ	15
\|\| tantrāvatārapaṭalaḥ \|\|	16
kailāsadakṣiṇe śṛṅge nānāścaryasamanvite \| pravṛddhavaṭavṛkṣotthacchāyācchanne'tivistṛte \|\| 3/1 \|\| vyāghracarmaparīdhāne pīṭhe ratnopaśobhite \| devadānavagandharvasiddhavidyādharādibhiḥ \|\| 3/2 \|\| sevyamānaṃ mahādevaṃ śrīkaṇṭhaṃ viśvanāyakam \| kauśikaḥ kāśyapo'gastyo gautamo nāradastathā \|\| 3/3 \|\| sanatkumāraḥ sanakaḥ sanātanasanandanau \| bhṛguścātribharadvājavasiṣṭhādyā maharṣayaḥ \|\| 3/4 \|\| jijñāsavaḥ paraṃ jñānaṃ śivaśaktyunmukhīkṛtāḥ \| praṇamya caraṇau tasya prāhurīśamumāpatim \|\| 3/5 \|\|	17
ṛṣayaḥ-	18
bhagavan devadeveśa paśupāśavimocaka \| sṛṣṭisthititirobhāvalayānugrahakāraka \|\| 3/6 \|\| viyadādimahāmāyāvṛtteḥ sākṣātpravartaka \| sahajānandasandohasvasaṃvillakṣaṇātmaka \|\| 3/7 \|\| parasaṃvitsvarūpiṇyā śaktyā paramayā yuta \| digdeśakālanirmukta jagadāhlādakāraṇa \|\| 3/8 \|\| vayaṃ niyuktā deveśa tvayejyāyāṃ śivasya tu \| tadarthaṃ sārabhūtaṃ tu śāstraṃ śivamukhodbhavam \|\| 3/9 \|\| vaktumarhasi deveśa bhaktānāmanukampayā \| ityevaṃ ṛṣibhiḥ pṛṣṭo bhagavān vṛṣabhadhvajaḥ \|\| 3/10 \|\| prāha gambhīrayā vācā sphuraccandrārdhaśekharaḥ \| sādhu pṛṣṭaṃ hi yuṣmābhiśśṛṇudhvaṃ saṃśitavratāḥ \|\| 3/11 \|\| kāmikākhyānmahātantrāduddhṛtaṃ śāstramuttamam \| avatīrṇamidaṃ merau praṇavādyavatārakaiḥ \|\| 3/12 \|\| kriyācaryāsamopetaṃ yogajñānānvitaṃ param \| ityevamuktā ṛṣayaḥ praṇemurdaṇḍavatkṣitau \|\| 3/13 \|\| teṣāmājñāṃ śivo datvā prāha tantramanuttamam \| ādāvabhūd dvidhā jñānamadhikārivibhedataḥ \|\| 3/14 \|\| parāpareṇa bhedena patipaśvarthadarśakam \| śivaprakāśakaṃ jñānaṃ śivajñānaṃ paraṃ smṛtam \|\| 3/15 \|\| vedādyaparaṃ jñānaṃ paśupāśārthadarśakam \| yathā vilakṣaṇaṃ cakṣuḥ kṣapāyāṃ nṛbiḍālayoḥ \|\| 3/16 \|\| tathā vilakṣaṇaṃ jñānamevametatparāparam \| laukikaṃ vaidikaṃ caiva tathādhyātmikameva ca \|\| 3/17 \|\| atimārgaṃ va mantrākhyaṃ tantrametadanekadhā \| sadyovāmamahāghorapuruṣeśānamūrtayaḥ \|\| 3/18 \|\| pratyekaṃ pañcavaktrāstyustairuktaṃ laukikādikam \| pañcaviṃśatibhedena srotobhedaḥ prakīrtitaḥ \|\| 3/19 \|\| eṣvevāntargataṃ vaktuṃ vāṅmayaṃ vastuvācakam \| teṣveva mantratantrākhyaṃ sadāśivamukhodgatam \|\| 3/20 \|\|	19
(pṛ0 4)	20
siddhāntaṃ gāruḍaṃ vāmaṃ bhūtatantraṃ ca bhairavam \| ūrdhvapūrvakuberāsyayāmyavaktrādyathākramam \|\| 3/21 \|\| īśānavaktrādūrdhvasthājjñānaṃ yatkāmikādikam \| daśāṣṭādaśabhedena śivarudrāvatārakaiḥ \|\| 3/22 \|\| ṣaṭṣaṣṭibhiḥ krameṇaiva kathitaṃ tu śivājñayā \| tadeva yugabhedena sadyojātādimūrtibhiḥ \|\| 3/23 \|\| prakāśitaṃ caturbhedaṃ mūrtisaṃkhyāvaśena tu \| saṃkhyayā gāruḍaṃ tadvat pūrvavaktrādvinirgatam \|\| 3/24 \|\| sāvitryādyaṃ ca siddhyarthamuktaṃ tadavatārakaiḥ \| nayasūtrādibhedena vāmaṃ vāmādvinirgatam \|\| 3/25 \|\| caturviṃśatisaṃkhyākamavatīrṇaṃ śivājñayā \| kaulādiviṃśatsaṃkhyātaṃ bhūtatantraṃ tu sadyataḥ \|\| 3/26 \|\| dvividhaṃ tantramudbhūtaṃ bhairavaṃ dakṣiṇāsyataḥ \| asitāṅgādibhirbhūmau kathitaṃ tadanekadhā \|\| 3/27 \|\| pratyekaṃ tantrabhedoktau jāyate granthavistaraḥ \| atha siddhāntatantrāṇāmavatāro nigadyate \|\| 3/28 \|\| tanoti vipulānarthāṃstattvamantrasamāśritān \| trāṇaṃ ca kurute yasmāttantramityabhidhīyate \|\| 3/29 \|\| kāmikaṃ praṇavākhyasya parārdhagranthasaṃkhyayā \| praṇavāt trikalaḥ prāptaḥ trikalācca tato haraḥ \|\| 3/30 \|\| trayaścaivopabhedāḥ syurvaktrāraṃ bhairavottaram \| nārasiṃhaṃ ca viprendrāḥ kathyate kāmikatrayam \|\| 3/31 \|\| yogajaṃ tu sudhākhyasya proktaṃ tallakṣasaṃkhyayā \| sudhākhyādbhasma saṃprāptastataḥ prāpto vibhuḥ kramāt \|\| 3/32 \|\| vīṇāśikhottaraṃ tāraṃ santaṃ santatireva ca \| ātmayogaṃ ca pañcaite yogatantrasya bhedakāḥ \|\| 3/33 \|\| cintyaṃ sudīptasaṃjñasya proktaṃ śatasahasrakaiḥ \| dīptācca gopatiḥ prāptastataḥ prāptā tu cāmbikā \|\| 3/34 \|\| sucintyaṃ subhagaṃ vāmaṃ pāpanāśaṃ parodbhavam \| amṛtaṃ cintyantantrasya ṣaḍvidhaṃ tu prakīrtitam \|\| 3/35 \|\| kāraṇaṃ kāraṇākhyasya koṭigranthena coditam \| kāraṇāccharvarudrastu śarvātprāptaḥ prajāpatiḥ \|\| 3/36 \|\| kāraṇaṃ pāvanaṃ dorgaṃ ? māhendraṃ bhīmameva ca \| tatastu māraṇaṃ dveṣṭaṃ saptadhā kāraṇaṃ tathā \|\| 3/37 \|\| ajitaṃ suśivākhyasya niyutagranthasaṃkhyayā \| suśivākhyācchivaḥ prāptastacchivādacyutastataḥ \|\| 3/38 \|\| prabhūtañca parodbhūtaṃ pārvatī padmasaṃhitā \| caturbhedamidaṃ tantraṃ cāsmin tantre prakīrtitam \|\| 3/39 \|\| dīptamīśasya vikhyātaṃ niyutagranthasaṃkhyayā \| īśānamūrtiḥ saṃprāptastataḥ prāpto hutāśanaḥ \|\| 3/40 \|\| ameyaṃ śabdāmācchādyamasaṃkhyamamitaujasam \| ānandaṃ mādhayodbhūtamadbhūtaṃ cākṣataṃ tathā \|\| 3/41 \|\| dīptaṃ tu navadhā proktaṃ sūkṣmatantraṃ nibodhata \| sūkṣmaṃ sūkṣmasya saṃproktaṃ tadūgranthaṃ padmasaṃkhyayā \|\| 3/42 \|\| sūkṣmādvaiśravaṇaḥ prāptastasmātprāptaḥ prabhañjanaḥ \| tatsūkṣmamekabhedaṃ syātsūkṣmamityabhidhīyate \|\| 3/43 \|\| sahasraṃ kālasaṃjñasya? proktaṃ vai śaṅkhasaṃkhyayā \| kālādbhīmastataḥ prāpto bhīmāddharmo yathā tathā \|\| 3/44 \|\| atītaṃ maṅgalaṃ śuddhamaprameyaṃ tu jātibhāk \| prabuddhaṃ vibudhaṃ hastamalaṅkāraṃ subodhakam \|\| 3/45 \|\| ete sahasratantrasya daśasaṃkhyāḥ prakīrtitāḥ \| aṃśumānambusaṃjñasya pañcalakṣeṇa kīrtitaḥ \|\| 3/46 \|\| agraścaivāmbusaṃjñācca agrātprāptastato raviḥ \| vidyāpurāṇatantraṃ ca vāsavaṃ nīlalohitam \|\| 3/47 \|\| prakāraṇaṃ bhūtatantramātmālaṅkārameva ca \| kāśyapaṃ gautamaṃ caindraṃ brāhmaṃ vāsiṣṭhameva ca \|\| 3/48 \|\|	21
(pṛ0 5)	22
aiśānaṃ nāmataḥ proktamaṃśumān dvādaśa smṛtaḥ \| suprabhedaṃ māhāśāstraṃ daśeśasya prakīrtitam \|\| 3/49 \|\| vighneśvaro daśeśācca śaśī prāpto gaṇeśvarāt \| trikoṭisaṃkhyayā prokto bhedaścātra na vidyate \|\| 3/50 \|\| kriyādijñānaparyantaṃ tantramatraiva dṛśyate \| śivabhedamiti prokto rudrabhedastathocyate \|\| 3/51 \|\| rudrasyānādisaṃjñasya vijayaṃ tantramuttamam \| parameśastataḥ prāptastrikoṭigranthasaṃkhyayā \|\| 3/52 \|\| vijayaṃ codbhavaṃ saumyamaghoraṃ mṛtyunāśanam \| kuberaṃ ca māghoraṃ vimalaṃ vijayāṣṭakam \|\| 3/53 \|\| niḥśvāsaṃ tu daśārṇasya proktaṃ tatkoṭisaṃkhyayā \| daśārṇāt śailajā prāptā cāṣṭabhedena bheditam \|\| 3/54 \|\| niḥśvāsottaraniḥśvāsau niḥśvāsasya mukhodayam \| niḥśvāsanayanaṃ caiva tathā niḥśvāsakārikā \|\| 3/55 \|\| ghorasaṃjñaṃ yamākhyaṃ ca guhyaṃ cāpyevamaṣṭadhā \| nidhanasya svayaṃbhūtaṃ trikoṭyardhena kīrtitam \|\| 3/56 \|\| nidhaneśātsvayaṃbhūtaṃ śrutavānnalinodbhavaḥ \| prajāpatimataṃ padmaṃ svāyambhuvamiti tridhā \|\| 3/57 \|\| āgneyaṃ yacca tadvyomno granthasaṃkhyāyutatrayāt \| āgneyaṃ tantramekaṃ tu tasmātprāpto hutāśanaḥ \|\| 3/58 \|\| tejastu vīraṃ saṃprāpto niyutagranthasaṃkhyayā \| prajāpatistataḥ prāptastrayodaśavibhedakam \|\| 3/59 \|\| prastāraṃ phullamallañca (phullamamalaṃ ?) prabodhaṃ bodhabodhakam \| amohaṃ mohasamayaṃ hākaṭaṃ śākaṭādhikam \|\| 3/60 \|\| halaṃ vilekhanaṃ bhadraṃ vīraṃ vīre trayodaśa \| rauravaṃ brāhmaṇeśasya cārbudāṣṭakasaṃkhyayā \|\| 3/61 \|\| nandikeśastataḥ prāptaḥ ṣaḍbhedañca vidhīyate \| kālaghnaṃ ca kalātītaṃ rauravaṃ rauravottaram \|\| 3/62 \|\| mahākālamataṃ caindraṃ rauravaṃ ṣaḍvidhaṃ matam \| makuṭaṃ tu śivākhyasya śatasāhasrasaṃkhyayā \|\| 3/63 \|\| mahādevastataḥ prāpto bhedaśca dvividho bhavet \| makuṭottaraṃ ca makuṭaṃ dvividhena vidhīyate \|\| 3/64 \|\| sarvātmakasya vimalaṃ trilakṣagranthasaṃkhyayā \| vīrabhadrastataḥ prāpto bhedāḥ ṣoḍaśasaṃkhyayā \|\| 3/65 \|\| anantaṃ bhogamākrāntaṃ vṛṣapiṅgaṃ vṛṣodaram \| vṛṣādbhutaṃ sudantaṃ ca raudraṃ bhadravidhaṃ tathā \|\| 3/66 \|\| arevatamatikrāntamaṭṭahāsamalaṅkṛtam \| arcitaṃ dhāraṇaṃ tantraṃ vimalaṃ ṣoḍaśaiva tu \|\| 3/67 \|\| candrajñānamanantasya trikoṭigranthasaṃkhyayā \| bṛhaspatistataḥ prāpto bhedāścātra caturdaśa \|\| 3/68 \|\| sthiraṃ sthāṇuṃ mahāntaṃ ca vāruṇaṃ nandikeśvaram \| ekapādapurāṇaṃ ca śaṅkaraṃ nīlarudrakam \|\| 3/69 \|\| śivabhadraṃ kalpabhedaṃ śrīmukhaṃ śivaśāsanam \| śivaśekharamākhyātaṃ devyā mataṃ tathaiva ca \|\| 3/70 \|\| candrajñānasya tantrasya caturdaśavidho bhavet \| mukhabimbaṃ praśāntasya śatasāhasrasaṃkhyayā \|\| 3/71 \|\| dadhīcistu tataḥ prāpto bhedāḥ pañcadaśaiva tu \| caturmukhamalāyogaṃ saṃstobhaṃ pratibimbakam \|\| 3/72 \|\| ātmālaṅkāravāyavye tauṭikaṃ tuṭinīrakam \| kalātyayaṃ tulāyogaṃ kuṭṭimaṃ paṭṭaśekharam \|\| 3/73 \|\| mahāvidyā mahāsauraṃ bimbaṃ pañcadaśaiva tu \| prodgītaṃ śūlinaḥ proktaṃ lakṣatritayasaṃkhyayā \|\| 3/74 \|\| kavacākhyastataḥ prāpto bhedāḥ ṣoḍaśasaṃkhyayā \| kavacaṃ caiva vārāhaṃ piṅgalāmatameva ca \|\| 3/75 \|\| pāśabandhaṃ daṇḍadharamaṅkuśaṃ ca dhanurdharam \| śivajñānaṃ ca vijñānaṃ śrīkālajñānameva ca \|\| 3/76 \|\|	23
(pṛ0 6)	24
āyurvedaṃ dhanurvedaṃ sarpadaṃṣṭrīvibhedanam \| gītaṃ bharatamātodyaṃ prodgītaṃ ṣoḍaśaiva tu \|\| 3/77 \|\| lalitaṃ cālayeśasya proktamaṣṭasahasrakam \| ālayāllālitaḥ (bhairavaḥ?) prāpto lalitaṃ lalitottaram \|\| 3/78 \|\| kaumāraṃ caiva tadbhedaṃ trividhaṃ parikīrtitam \| bindoḥ siddhamidaṃ tantraṃ koṭikoṭyardhasaṃkhyayā \|\| 3/79 \|\| bindu (saṃjñāttu?) siddhākhyaṃ prāptaścaṇḍeśvaraḥ paraḥ \| sārottaramathānyattu auśanottarameva ca \|\| 3/80 \|\| śālābhedaṃ śaśīkhaṇḍaṃ siddhaṃ tantraṃ caturvidham \| santānaṃ śivaniṣṭhasya ṣaṭ sahasraṃ tu saṃkhyayā \|\| 3/81 \|\| asaṃvāyastataḥ prāpto bhedaḥ saptavidho bhavet \| liṅgādhyakṣaṃ surādhyakṣaṃ śaṅkaraṃ tvamaleśvaram \|\| 3/82 \|\| asaṃkhyamanilaṃ dvandvaṃ santānaṃ saptadheritam \| somadevasya śarvoktaṃ dvilakṣeṇaiva saṃkhyayā \|\| 3/83 \|\| nṛsiṃhaḥ prāptavān somādbhedaḥ pañcavidho bhavet \| śivadharmottaraṃ caiva vāyuproktaṃ tathaivaca \|\| 3/84 \|\| divyaproktamathaiśānaṃ śarvodgītaṃ vidhīyate \| śrīdevyāstu samākhyātaṃ pārameśvaramuttamam \|\| 3/85 \|\| granthadvādaśalakṣaṃ tu saptadhā prasṛtaṃ tu tat \| uśanomunisaṃprāptaḥ śrīdevyāśca yathākramāt \|\| 3/86 \|\| mataṅgaṃ yakṣiṇīpadmaṃ pārameśvarameva ca \| puṣkaraṃ suprayogaṃ ca haṃsaṃ sāmānyameva hi \|\| 3/87 \|\| kiraṇaṃ devavibhave koṭipañcakasaṃkhyayā \| saṃvartakastataḥ prāpto bhedāstu navasaṃkhyayā \|\| 3/88 \|\| gāruḍaṃ nairṛtaṃ nīlaṃ rūkṣaṃ bhānukadhenuke \| prabuddhaṃ buddhakālākhye navadhā kiraṇo bhavet \|\| 3/89 \|\| śivasya vātulaṃ proktaṃ granthāḥ śatasahasrakam \| mahākālastataḥ prāpto bhedā vai dvādaśaiva tu \|\| 3/90 \|\| vātulaṃ cottaraṃ caiva kālajñānaṃ prarohitam \| sarvaṃ dharmātmakaṃ śreṣṭhaṃ nityaṃ śuddhaṃ mahānanam \|\| 3/91 \|\| viśvaṃ viśvātmakaṃ caiva vātule dvādaśa smṛtāḥ \| aṣṭāviṃśatitantrāṇāṃ mūlabhedāḥ prakīrtitāḥ \|\| 3/92 \|\| kāmikaṃ pādayugmaṃ syādyogajaṃ gulphameva ca \| cintyaṃ pādāṅguliḥ proktaḥ kāraṇaṃ jaṅghikā bhavet \|\| 3/93 \|\| ajitaṃ jānudeśaṃ syāddīptamūrupradeśakam \| sūkṣmantu guhyamevaṃ syātsahasraṃ kaṭideśakam \|\| 3/94 \|\| aṃśumān syāt pṛṣṭhatalaṃ suprabhedaṃ tu nābhikam \| vijayaṃ kukṣideśaṃ syānniḥśvāsaṃ hṛdayaṃ bhavet \|\| 3/95 \|\| svāyaṃbhuvaṃ stanau dvau tu analaṃ netrameva ca \| vīraṃ kaṇṭhapradeśastu rauravaṃ śrotrameva ca \|\| 3/96 \|\| makuṭaṃ mākuṭaṃ tantramaṅgapratyaṅgameva ca \| bāhū tu vimalaṃ proktaṃ candrajñānamuraḥsthalam \|\| 3/97 \|\| bimbatantraṃ suvadanaṃ prodgītaṃ rasanā bhavet \| lalitaṃ syātkapolaṃ tu siddhaṃ caiva lalāṭakam \|\| 3/98 \|\| santānaṃ kuṇḍalaṃ vidyāccharvoktamupavītakam \| pārameśena hāraṃ tu kiraṇaṃ ratnabhūṣaṇam \|\| 3/99 \|\| vātulaṃ vasanaṃ proktaṃ śivadharma tripuṇḍrake \| kalpañcaiva tu saṃyoge śivadharmānulepane \|\| 3/100 \|\| bimbaṃ puṣpe ca mālye ca siddhāntena niveditam \| tantrātmakaśarīreṇa mantramūrtimayena tu \|\| 3/101 \|\| eteṣāmupabhedaiśca sādākhyaṃ mūrtimat sthitam \| śivarudrātmakaṃ tantramaṣṭāviṃśatisaṃkhyakam \|\| 3/102 \|\| cintāmaṇiriva bhrāji caikadhā bahudhā diśet \| yadyapyeko bhavedvaktā śrotṛbhedādanekadhā \|\| 3/103 \|\| karṣaṇādipratiṣṭhāntaṃ mūlenaiva samācaret \| kṛtañcedupabhedena kartā bhartā vinaśyati \|\| 3/104 \|\|	25
(pṛ0 7)	26
kevalaṃ yajanaṃ proktamupabhedairviśeṣataḥ \| pratiṣṭhādyaṃ tu mūlaiścet aṣṭāviṃśatibhirvaram \|\| 3/105 \|\| yena tantreṇa cārabdhaṃ karṣaṇādyarcanāntakam \| tena sarvaṃ prakartavyaṃ na kuryādanyatantrataḥ \|\| 3/106 \|\| kārayedanyatantreṇa noktaṃ cettu viśeṣataḥ \| uktāni pratiṣiddhāni punaḥ saṃbhāṣitāni ca \|\| 3/107 \|\| sāpekṣanirapekṣāṇi śivavākyānyanekadhā \| catuṣpādayutānyeva bhuktimuktyarthasādhanam \|\| 3/108 \|\| etānyevātha śrutvā tu devairmunivarādibhiḥ \| saṃkṣepato'pi kathitaṃ sarveṣāmanukampayā \|\| 3/109 \|\| eṣāmadhyayanaṃ kāryaṃ śivaviprairgurukramāt \| avyāpanaṃ ca kartavyaṃ na kāryamitarairnaraiḥ \|\| 3/110 \|\| dīkṣāvihīnaviprādyāstrivarṇāśśūdrajātayaḥ \| savarṇādyanulomāśca śilpinaḥ kārukādayaḥ \|\| 3/111 \|\| paṭhanti śivaśāstrañcettatpāpānnṛparāṣṭrayoḥ \| acireṇa vināśaḥ syāttasmādrājā nivārayet \|\| 3/112 \|\| śivasiddhāntatantreṇa prārabdhaṃ karṣaṇādikam \| na kuryādanyaśāstreṇa kuryāccettantrasaṃkaraḥ \|\| 3/113 \|\| tantrasaṃkaradoṣeṇa rājā rāṣṭraṃ ca naśyati \| gāruḍaṃ bhūtatantraṃ ca bhairavaṃ vāmatantrakam \|\| 3/114 \|\| kāpālaṃ pāñcarātraṃ ca lākulaṃ kulaśāstrakam \| tantraṃ pāśupataṃ cānyat purāṇaṃ dharmaśāstrakam \|\| 3/115 \|\| itihāsaṃ ṣaḍṅgaṃ ca ṛgyajuḥ sāmasaṃjñakam \| atharvaṇaṃ tathā bauddhamārhataṃ matameva ca \|\| 3/116 \|\| ūrdhvasroto'kṣapācchāstrādaparaṃ tadanukramāt \| kāmikādi śivajñānaṃ mūrdhā bhagavataḥ sadā \|\| 3/117 \|\| itarāṇi maheśasya hṛtkaṇṭhādyaṅgakāni vai \| pūrvapakṣatayā tāni kathitānīha śambhunā \|\| 3/118 \|\| heyopādeyavastūnāṃ nirṇaye paramārthataḥ \| tatsarvamadharīkṛtya śaivasiddhānta īritaḥ \|\| 3/119 \|\| siddhāntaśāstraniṣṭhaiśca śivaviprairyathākramam \| śāstrāntaraistu saṃsthāpya liṅgaṃ tadubhayārthakam \|\| 3/120 \|\| pūjanīyaṃ nṛpagrāmayajamānābhivṛddhaye \| śaivaḥ sarvādhikārī syātsvakīye ca paratra ca \|\| 3/121 \|\| śaivāḥ sarveṣu kurvanti ye gṛhasthā dvijottamāḥ \| yāmale mātṛtantre ca kāpāle pāñcarātrake \|\| 3/122 \|\| bauddhe cārhamate caiva lākule vaidike'pi ca \| anyeṣvapi ca mārgeṣu tattacchāstraiḥ svaśāstrataḥ \|\| 3/123 \|\| śaivāḥ kurvanti dīkṣādyaṃ talliṅgasthāpanādikam \| mukhyatvādiha śaivasya mukhamāhātmyato'pi ca \|\| 3/124 \|\| adhikāro'sti sarvatra nānyeṣāṃ śivadarśane \| tasmātparārthamātmārthaṃ sthāpanaṃ yajanaṃ tathā \|\| 3/125 \|\| śivavipreṇa kartavyamanyeṣāṃ svārthameva hi \| parārthamapi kuryāccellopena nṛpatestathā \|\| 3/126 \|\| tadrāṣṭrasya ca nāśaḥ syādacireṇa na saṃśayaḥ \|	27
\|\| 3/iti kāmikākhye mahātantre kriyāpāde tantrāvatārapaṭalaḥ prathamaḥ \|\|	28
	29
\|\| atha mantrāvatārapaṭalaḥ \|\|	30

Showing 1 to 30 of 723 entries

Previous1 2 3 4 5…25Next